અલંગ યાર્ડમાં જુગાર પર LCBનો દરોડો: ₹12,440 સાથે ત્રણ ઝડપાયા

ભાવનગર જિલ્લામાં ગેરકાયદેસર જુગાર પ્રવૃત્તિઓ સામે કાર્યવાહી અંતર્ગત ભાવનગર લોકલ ક્રાઇમ બ્રાન્ચ (LCB)એ અલંગ યાર્ડ વિસ્તારમાં દરોડો પાડી ગંજીપત્તાના પાનાંથી હાથકાંપનો હાર-જીતનો જુગાર રમતા ત્રણ ઇસમોને ઝડપી પાડ્યા હતા. પોલીસ દ્વારા રોકડ રૂપિયા 12,440 સહિતનો મુદ્દામાલ કબ્જે કરવામાં આવ્યો છે. મળતી માહિતી મુજબ, પોલીસ મહાનિરીક્ષક શ્રી રાજેન્દ્ર વી. અસારી અને પોલીસ અધિક્ષક શ્રી નિતેશ પાંડેયના માર્ગદર્શન હેઠળ LCBને શહેર તથા ગ્રામ્ય વિસ્તારમાં દારૂ અને જુગાર જેવી ગેરકાયદેસર પ્રવૃત્તિઓ સામે કડક કાર્યવાહી કરવા સૂચના આપવામાં આવી હતી. તા. 24 મે 2026ના રોજ LCBની ટીમ અલંગ પોલીસ સ્ટેશન વિસ્તારમાં પેટ્રોલિંગમાં હતી ત્યારે બાતમી મળી હતી કે અલંગ યાર્ડ પ્લોટ નંબર-22 સામે કેટલાક ઇસમો ગંજીપત્તાના પાનાંથી પૈસાની હાર-જીતનો જુગાર રમી રહ્યા છે. બાતમીના આધારે પોલીસે તાત્કાલિક રેડ કરી કાર્યવાહી હાથ ધરી હતી. દરોડા દરમિયાન પોલીસે ત્રણ ઇસમોને ઝડપી પાડ્યા હતા. ઝડપાયેલા આરોપીઓમાં ઉત્તરપ્રદેશ અને મહારાષ્ટ્રના વતની મજૂરી તથા ડ્રાઇવિંગ કામ સાથે સંકળાયેલા ઇસમોનો સમાવેશ થાય છે, જે હાલ અલંગ યાર્ડ વિસ્તારમાં રહેતા હતા. પોલીસે સ્થળ પરથી ગંજીપત્તાના 52 પાના અને રોકડ રૂપિયા 12,440 કબ્જે કર્યા હતા. આ મામલે અલંગ પોલીસ સ્ટેશનમાં જુગાર પ્રતિબંધક ધારાની કલમ હેઠળ ગુનો નોંધાવી આગળની કાર્યવાહી હાથ ધરવામાં આવી છે. આ સમગ્ર કામગીરી LCB ઇન્ચાર્જ પોલીસ ઇન્સ્પેક્ટર પી.સી. શીંગરખીયાના માર્ગદર્શન હેઠળ PSI આર.એ. વાઢેર, પી.ડી. ઝાલા અને LCB સ્ટાફની ટીમ દ્વારા સફળતાપૂર્વક પાર પાડવામાં આવી હતી.